Seigt kjøt treng lang tid, gjerne fire-fem timar eller meir, men sluttresultatet blir betre enn nokon biff, sidan det seige bindevevet smeltar til kollagen og gelatin og gjer ei fyldig, mjuk kjensle i munnen.
Det aller enklaste, om ein har ei god gryte, er å koke det opp på plata og så sette det inn i 100 gradar varm omn, nokon fordelar skal ein ha av elektrisk omn. Til dømes sette det inn på føremiddagen på søndagen, dra ut på tur, og så koma heim og berre smaka det til før det er klart. Over natta, eller til ein er heime frå jobb, går òg fint. Heilt trygt med låg varme på omnen. Går fint med både emaljerte og uemaljerte stål- og støypejernsgryter. Eg brukar ikkje gryter med plastikkdelar som ikkje er sertifisert for omn, eller med belegg, når eg kokar lenge i steikeomnen.
Typisk norsk er å la det trekke i eiga kraft, eller i kraft ein har kokt alt på bein, og lage sodd av det, eller å brune det og la det syde i god brunsaus. Meir kontinentalt kan ein bruke ein god mengde raudvin, timian og ein god mengde med skiva gulrøtter - brun alt og hell på vin og kraft la det stå i timesvis. Har du eit par renska og skrapa svinelabbar så sleng dei òg oppi, dei gjer frå seg smak og gelatin og gjer sydevæska enno tjukkare og rikare.